کاروان قلم اٹک کے زیر اہتمام 23 مئی 2021 کو ایک محفل مشاعرہ کا انعقاد کیا گیا جس کی صدارت معروف شاعر و ادیب مدیرِ "جمالیات ” طاہر اسیر نے کی نظامت کے فرائض کاروان قلم کے ایڈمن نزاکت علی نازک نے ادا کیے مشاعرے میں مہمانِ خصوصی اٹک کے معروف شاعر احمد علی ثاقب تھے جبکہ مہمانِ اعزاز کاروان قلم کے سیکریٹری نشرو اشاعت سید حبدار قائم تھے مشاعرے میں نزاکت علی نازک ،سید حبدار قائم ، احمد علی ثاقب اور طاہر اسیر نے اپنا کلام سنایا۔ مشاعرے کی عکس بندی نعلین حیدر سلطان نے کی
شعرا کے کلام سے چند شعر ملاحظہ کیجیے:۔
نزاکت علی نازک
کبھی ندیا کنارے پر ترا چلنا
کنارے بیٹھ کر مجھ سے
ترا وہ گفتگو کرنا
تو ایسے میں
ہوا کے تیز جھونکے سے
تری زلفیں ہوا میں رقص کرتی تھیں
میں ان کی ٹھنڈی چھاوں میں
سکوں کا سانس لیتا تھا
سید حبدار قائم
مرے گھر کی چھت پر نبیؐ کا علم ہے
میں کیسے کہوں کہ مرے گھر میں غم ہے
احمد علی ثاقب
روز دو چار چلے آتے ہیں سمجھانے مگر
کون لوٹا ہے محبت میں خسارہ کر کے
طاہر اسیر
زندگی یوں بھی تو آہستہ سے کھل اٹھتی ہے
جیسے اک زخم کا چپکے سے ہرا ہو جانا
کورونا ایس او پیز کو مدنظر رکھتے ہوئے مشاعرے میں صرف چار شعرا کو دعوت دی گئی جنہوں نے بہت خوب صورت کلام سنائے خصوصا صدر محفل طاہر اسیر نے اپنے خوب صورت کلام پر بہت داد سمیٹی ۔ مشاعرے کو سوشل میڈیا پر لائیو دکھایا گیا سابقہ مشاعروں کی سوشل میڈیا پر پزیرائی کا ذکر بھی کیا گیا۔ اور عوام کا شکریہ بھی ادا کیا گیا
سیّد حبدار قائم
سیکریٹری کاروان قلم
اٹک
میرا تعلق پنڈیگھیب کے ایک نواحی گاوں غریبوال سے ہے میں نے اپنا ادبی سفر 1985 سے شروع کیا تھا جو عسکری فرائض کی وجہ سے 1989 میں رک گیا جو 2015 میں دوبارہ شروع کیا ہے جس میں نعت نظم سلام اور غزل لکھ رہا ہوں نثر میں میری دو اردو کتابیں جبکہ ایک پنجابی کتاب اشاعت آشنا ہو چکی ہے
تمام تحریریں لکھاریوں کی ذاتی آراء ہیں۔ ادارے کا ان سے متفق ہونا ضروری نہیں۔
