میرے کیمبلپور جیا ہور وکھا
تو سچا ایں تے سامنے آ
سنتریاں ورگا شہر وکھا
توں برفی لڈو نال رلا
اتھے آل دوالے اللہ ہُو
اتھے آل محمد ﷺ دی خوشبو
اتھے پنجتن پاک دے رستے ہن
سادات دے بچڑے وَسدے ہِن
اتھے رونق دِسدی گلیاں وچ
جویں پُھل گلاب دا کلیاں وچ
ای جوآر دے گنے تُر ورگا
میرا کیمبلپور اے سُر ورگا
کیویں سونا وکدا تولے سُنڑ
اِتھ ماہیے سنڑ اِتھ ڈھولے سُنڑ
تو گُھل ویسیں نالے بُھل ویسیں
ساری دنیا وچ توں رُل ویسیں
تینوں دنیا وچ ایجا نٸیں ملڑاں
جیجا ای کِھڑیا ایجا نٸیں کِھڑناں
ساری دنیا وچ توں چکر لا
ہک وار ازما کے پھیرا پا
اتھے سوہنڑے جگ توں وسدے ہن
سانوں پیر بزرگ دَسدے ہن
توں ویکھنا اے تے جلدی آ
وچ کیمبلپور دے پھیرا پا
اتھے ہر شے ویکھ نرالی اے
جویں جھولی مانواں آلی اے
پی ددھ پتیاں یا کھانا کھا
اتھے پاۓ چاول چھولے کھا
مِٹھی نختی نال مکھانڑیں کھا
اتھے چھلّی بُھجی دانڑیں کھا
اتھے منگ پھلیاں دی ذات وی اے
اتھے بیراں دی سوغات وی اے
گنگیر ملے کالے چِٹے وچ
جویں دانڑیں ہوندے سِٹے وچ
اتھے ٹیشن ویکھ سرنگاں ویکھ
اتھے لسی پی تے لونڑِیں کھا
اتھے شاعر سُنڑ کِنج لکھدے ہِن
وچ ہِجَر ماہی دے سِکدے ہِن
اتھے اسفند یار بخاری اے
جیں دشمن دی مت ماری اے
تو مینڈا یار نسیم بھی سنڑ
اتھے حکمت یار مقیم بھی سنڑ
سُنڑ گیت، عطا بھی گاندا اے
اتھے صابر غزل چاندا اے
اتھے گُلی ڈنڈے نال بھی کھیڈ
اتھے کھینو نا ڈنڈ پاکی لا
اسی گھگھو گھوڑے تکدے رۓ
اسی دھرتی ما تے کٹدے رۓ
اتھے کُڑیاں نڈے بہوں سونہڑے
جیویں حوراں نوراں دے گہنڑے
اتھے کُڑیاں ونگاں پاندیاں ہن
اتھے گھڑے کُچھڑ چاندیاں ہن
اتھے نتھلی کوکا ڈُھکدا اے
جنوں عاشق ویکھ کے رُکدا اے
اتھے دریا ویکھ پیا واہندا اے
جتھے کابل نا رل جاندا اے
اِندی اَرٹلری نوں توں بھی من
جتھوں گولے وجن دن دن دن
اے کیمبلپور اے سلطانی
پالے افغانی نالے ایرانی
اتھے پیلی سَریاں سجدی اے
جنوں ویکھنڑ دنیا بھجدی اے
اتھے سنگت رکھ فقیراں دی
تو بُھلسیں چال امیراں دی
اتھے ہسدے گاندے ہن بلبل
اتھے سوڑی تلیر دی چُلبل
اتھے چڑیاں کاں لوٹورے ہن
اتھے راول طوطی بَھورے ہن
اتھے چمچرڑاں تے گُھگھیاں ہن
اُتے مرغابی دے ڈبیاں ہن
میرے جی باباؒ تے قندھاریؒ
آ ویکھ انہاں دی سرداری
اتھے ننڑاں ہروٸی وگدے ہِن
جہڑے دھرتی اتے پھبدے ہِن
ہک چھانگلاؒ رب دا پیارا اے
جیں پتھری بیڑا تارا اے
ہک زارت سُنڑ کبوتراں دی
اُتھے جا کے وحدت شربت پی
اتھے قلعے مغلاں دے لبھدے
جہڑے کیمبلپور دے وچ پھبدے
ہک ملاٸی ٹولہ وسدا اے
جہڑا بچہ بچہ دسدا اے
ہر سکھ دا اتھے پھیرا اے
اتھے نانکؒ دا بی ڈیرا اے
تو آہدا ایں کجھ ہور وکھا
میں آہدا آں اتھے پھیرا پا
تینوں قاٸم آکھے جلدی کر
میرے کیمبلپور جیا ہور وکھا
Title Image by Hans from Pixabay
میرا تعلق پنڈیگھیب کے ایک نواحی گاوں غریبوال سے ہے میں نے اپنا ادبی سفر 1985 سے شروع کیا تھا جو عسکری فرائض کی وجہ سے 1989 میں رک گیا جو 2015 میں دوبارہ شروع کیا ہے جس میں نعت نظم سلام اور غزل لکھ رہا ہوں نثر میں میری دو اردو کتابیں جبکہ ایک پنجابی کتاب اشاعت آشنا ہو چکی ہے
تمام تحریریں لکھاریوں کی ذاتی آراء ہیں۔ ادارے کا ان سے متفق ہونا ضروری نہیں۔
