کل 17 جنوری 2021 آں کیمبل پوری ادبی سنہیا تنظیم نا پہلا باقاعدہ اجلاس گورنمنٹ پوسٹ گریجویٹ کالج کیمبل پور وچ ہویا اس اجلاس نی صدارت عثمان صدیقی ( ڈپٹی ڈائریکٹر کالجز کیمبلپور) اوراں کیتی تے اچیچے مزمان نے طور تے سید مونس رضا ( صدر تحریک ترویج اردو پاکستان) شریک ہوے.
تلاوت قرآن پاک نا شرف بی مونس رضا اوراں حاصل کیتا جد کہ اللہ نے سوہنڑیں رسول نی نعت حسین امجد سنڑائی… اج نے اجلاس وچ کیمبل پوری بولی نا ادبی ورثہ سامڑیں نی گل بات شروع ہوئی تے مشتاق عاجز صاحب آکھیا اسی سارے چاہنے آں کہ ہک اجیہا پلیٹ فارم ہووے جس اُتے رل مل کے اسی کیمبل پور نی ثقافت بچاواں اس واسطے اس تنظیم آں اساں بنڑایا ے ، اسی سارے اختلافات بھلا کے اس بولی نی خدمت کرنا چاہنے آں.
حبدار حسین قائم اوراں آکھیا کہ کیمبل پور ہک گلدستہ وے تے اس وچ رنگ رنگ نے پھل آپنی خشبو دینے پئین گھیبی چھاچھی جنڈالوی سارے پھل اُن، انہاں ساریاں جوڑو تے کیمبلپوری گلدستہ تیار ہونا….
سید نصرت بخاری صاحب پنجابی نے وکھرے وکھرے لہجیاں تے گل کرنیاں ہویاں آکھیا کہ جتنے بی محقق آئے انہاں ساریاں کیمبل پور نے لہجے آں وکھرے وکھرے ناں دتے برے کسی بی آپ آ کے تحقیق نئیں کیتی نتیجہ ای نکلیا کہ ساری دنیا کیمبل پور نے لہجے آں کدے ہندکو آکھیا کدے پوٹھوہاری تے کدے لہندی.. اساں ہن چاہی نا کہ اسی اس بولی نے وارث بن کے کم کراں تے لوکاں دساں کہ کیمبلپور وچ کیمبلپوری لہجہ وے نہ کہ ہندکو یا لہندا….. سید مونس رضا اوراں زور دتا کہ اساں آپنی ثقافت بچانڑیں واسطے لازمی مقامی بولی وچ ادب پیش کرنا پیسی.. آغا جی اوراں آکھیا جے ثقافت نی گل کرو تاں ثقافت مٹی نال جڑی ہونی تے اساں نی ثقافت اسی مٹی نال ساہ پئی گھینی اے اج اسی دور آں اس کولوں اج اسی اللہ دتا، اللہ وسایا، ناں نئیں رکھنے آں کیوں جے ای ناں پنجابی نین تے اساں اتے عربی فارسی غالب اے طاہر اسیر بولے کہ پنجابی نے ہر لہجے وچ کم ہویا برے سب توں تھوڑا کم کیمبلپوری وچ ہویا اس نی جھول اجے خالی خالی اے سو سال تو ضلع اباد اے برے 13 کتاباں توں ودھ کتاباں اتھے نئیں اساں چاہی نا کہ اسی ہوش کراں تے اس بولی نا ناں اُچا کراں….. صاحب صدر آخر وچ بولے کہ اساں اجے کوئی ناں دینڑاں ٹھیک نئیں پہلے اس نے قواعد لکھے ونجن وت اساں کوئی ناں دتا ونجے انہاں زور دتا کہ چھاچھی بولی نا وجود اس شہر وچ بی اے کہ پروین ملک شین باغ نی ہو کے چھاچھی وچ لکھیا برے اس گل آں تسلیم کرنا پیسی کہ بہوں گھٹ کم ہویا
گلاں باتاں تو بعد مشاعرہ ہویا جس وچ مشتاق عاجز نصرت بخاری حسین امجد ارشاد علی حبدار قائم نزاکت علی نازک تے آغا جی مقامی بولی چ نظماں سنڑائیاں….
شرکت کرنے والیاں چ طاہر اسیر نصرت بخاری مشتاق عاجز مونس رضا عثمان صدیقی حسین امجد نزاکت علی نازک خاور محیط شجاع اختراعوان عرفان نقیبی توقیر احمد ملک آغا جہانگیر بخاری تے ارشاد علی شامل اُن………. اگلے اجلاس نی تاریخ وت دسی ویسی
……………
طاہر اسیر
تمام تحریریں لکھاریوں کی ذاتی آراء ہیں۔ ادارے کا ان سے متفق ہونا ضروری نہیں۔
